Wéi mer elo Artikel 13 nach verhënnere kënnen a wäerten!

Gëschter (13.02) war de leschten Trilog a Saachen EU-Urheberrechtsreform, an et gouf sech op ee fir den Internet enorm schlechten Text verstännegt. Artikel 13 wäert méi wéi nëmmen Uploadfiltere mat sech bréngen. Wat genau festgehale gouf, kënnt der beim Julia Reda op sengem Blog noliesen. Hei soll et elo just dorëms goen, wats Du elo maache kanns, fir sécherzestellen, datt esouwuel déi lëtzebuergesch Regierung, ewéi eis 6 Europadeputéiert am definitive Vott géint dës Reform stëmmen. Weiterlesen »

Walsystem: Mäi Bréif un d’Parteien

Endlech endlech endlech… U sech hat ech schonn alles geplangt, preparéiert a quasi fäerdeg, an dann hunn ech mech awer vun allem iergenswéi ophale gelooss. Mä egal, lo ass et endlech esou wäit!

walsystemtweet2

Wéi ech schonn an de Stonnen no de Wale vum 14. Oktober ugekënnegt hat, ass mäi Bréif iwwer d’Problemer am Walsystem allgemeng elo tatsächlech erausgaangen, an dat via Post un d’Parteien, a via Mail un de Chamberpresident esouwéi d’Deputéiert an der Institutiounskommissioun. Noliese kënnt der ee Brouillon vum Bréif hei. (PDF)

Drastoe mécht u sech näischt groussaarteg Neies, reegelméissege Lieser*inne vu mengem Blog a mengem Twitteraccount kommen déi meescht Punkte sécherlech bekannt vir: Feelend Parteiegesetz, schlecht Sëtzverdeelung, onnéideg Bezierker, etc.

Dëse Blogpost soll u sech och just dozou déngen, jiddfer Interesséierten um Lafen ze halen, wat mam an duerch de Bréif eventuell an d’Rulle komm ass (an ob ech iwwerhaapt Réckmeldunge krut). De Post wäert also (hoffentlech) reegelméisseg geupdated ginn!

walsystemtweet1

Update 16.02.2019 21:47

Bis elo krut ech vu Leit vu 4 Parteie geäntwert. De Marc Angel vun der LSAP huet op de Koalitiounsaccord higewisen a gemengt, do stéinge jo eng ganz Rei vu Punkten dran, déi ech am Bréif ernimmt hunn. Den Henri Kox (déi gréng) huet mech fir no der Fuesvakanz invitéiert fir iwwer d’Punkten ze diskutéieren, an de President vun deene Gréngen, de Christian Kmiotek hat gemengt, de Bréif wier eng ganz gutt Diskussiounsgrondlag.

Vun der adr souwéi vun de Piraten huet jeeweils en Fraktiounsmataarbechter geäntwert gehat. Den Här vun der adr huet vum Gast Gibéryen ausriichte gelooss, datt en eng ganz Rei vu mengen Iwwerleeungen an d’Diskussiounen ëm eng eventuell Reform vum Walgesetz wäert abréngen. Den Här vun de Piraten huet drop verwisen, datt d’Piratepartei jo schonn eng ganz Rei vu menge Punkten opgegraff hat, an huet mech invitéiert fir mam Deputéierte Marc Goergen zesummen eppes auszeschaffen. Hei hunn ech awer dankend ofgelehnt a gemengt den Här Goergen misst sech fir d’éischt fir säi Verhalen an der Vergaangenheet bei mir an Aneren entschëllege bevir ech mech nees zesummen un een Dësch mat ëm setzen.

Vun der CSV, deene Lénken an der DP krut ech bis elo nach keng Réckmeldungen.

Digital Grondrechter: Wat erwaart eis 2019?

Et muss een sech Netzaktivist*innen an Dateschützer*innen als glécklech Mënsche virstellen. All puer Méint schliisslech gëtt et een Opschrei hei an Europa, datt entweder eis Fräiheetsrechter oder awer de fräien Internet vun iergendenger neier Veruerdnung oder Direktiv a Gefor geroden. Fir datt elo op mannst am neie Joer kee vun iech um falsche Fouss erwëscht gëtt, hunn ech mer d‘Méih gemaach ze kucke wat dann elo 2019 alles a Saachen (digital) Grondrechter op eis duerkënnt.
Weiterlesen »

Zukunftspartei? Zukunftspartei!

Si mer ëmmer nach um richtege Wee? Kënnen, sollen, mussen oder wëlle mer eis Prioritéite vläicht upassen? Ass d‘Zukunft vun der Partei ofgeséchert? Wann net, wat ass schif gelaf? Wann jo, geet eis dat duer? Kuerz no nationale Walen ass ëmmer eng gutt Zäit fir Parteien ee Schratt zréckzegoen an ze versichen aus der alldeeglecher Politik ze entfléien fir esou ee bessere Bléck op dat grousst Ganzt ze hunn. Ech versiche mech hei un esou enger kuerzer Analys vun deene Gréngen. Weiterlesen »

esports: Ob „Sport“ oder net ass u sech (net) egal!

Den esports, also dat kompetitiivt Videospillen, kënnt einfach net méi aus de mediale Schlagzeilen eraus. Ob wéinst engem Investissement vum Michael Jordan, wéinst der Decisioun vu McDonald‘s, net méi déi däitsch Männerfussball-Nationalequipe ze sponseren, mä léiwer am esports aktiv ze sinn, oder wéinst der grad fäerdeg gespillter Weltmeeschterschaft a „League of Legends“. Ganz beléift an der (virun allem däitschsproocheger) Press ass dobäi d‘Fro, ob den esports dann elo ee „richtege Sport“ ass, oder eben net. Och wann ech d‘Diskussioun doriwwer selwer enorm spannend fannen, ass d‘Äntwert dorobber wierklech egal, well pur Symbolik. Weiterlesen »

(Tësche)Fazit zum méi spéide Schoulufank: Politesche Wëlle gefrot!

Enn lescht Joer hat ech eng Petitioun lancéiert , déi gefuerdert huet, datt d‘Lycéeën an Zukunft eng Stonn méi spéit ufänke fir esou engersäits dem alldeegleche Verkéierskollaps entgéint ze wierken an anerersäits op wëssenschaftlech Erkenntnisser ze reagéieren, déi soen, datt Jugendlecher méi fit, méi konzentréiert, méi gesond a méi leeschtungsfäeg sinn, wann se moies eng Stonn méi laang schlofe kënnen. Ech hunn dës Iddi a gläich e puer Medien dierfe virstellen, an hat zum Schluss knapp iwwer 400 Ënnerschrëfte gesammelt. Weiterlesen »

Ettelbréck: Biergerbedeelegung ouni Wäert

Nieft enger gudder Informatiounspolitik ass eng eescht gemengte Biergerbedeelegung – virun allem op kommunalem Niveau – ee wichtege Pilier am Kampf géint Politikverdrossenheet an domadder och géint de Populismus. Zu Ettelbréck goufen et déi lescht Joren eng ganz Rei vu Méiglechkeete fir d‘Awunner*innen sech anzebréngen, wat absolut ze begréissen ass, just hapert et ëmmer erëm un der Ëmsetzung, esouwéi dem Eeschthuele vun esou Projeten.
Weiterlesen »